Əvvəl məqsəd, sonra rəqəm
Instagram reklamında hər kampaniyanın bir məqsədi olur: müraciət, satış, sayt ziyarəti və ya tanınma. Meta alqoritmi seçdiyiniz məqsədə uyğun insan axtarır. Müraciət istəyirsinizsə, amma kampaniyanı bəyənmə üçün qurmusunuzsa, alqoritm sizə bəyənən, amma yazmayan insanları gətirəcək.
Büdcəni bölməzdən əvvəl bir sual: bu ay nəyi ölçürük? Cavab bir sözdürsə, düzgün yoldasınız.
Az kampaniya, çox kreativ
Meta alqoritmi hər reklam dəsti üçün öyrənmə mərhələsindən keçir. Bu mərhələdən çıxmaq üçün təxminən bir həftədə 50 nəticə (məsələn, müraciət) lazımdır. Kiçik büdcəni beş reklam dəstinə bölsəniz, heç biri bu həddə çatmır və hamısı öyrənmə mərhələsində ilişib qalır.
Nəticə: kiçik büdcədə kampaniya sayını azaldın, kreativ sayını artırın. Bir reklam dəstinin içində 3-5 fərqli vizual və mətn test etmək beş ayrı kampaniyadan daha çox məlumat verir.
Soyuq və isti auditoriya
Soyuq auditoriya sizi hələ tanımayan insanlardır. İsti auditoriya isə səhifənizlə artıq qarşılaşanlardır: videonuza baxan, profilinizə girən, sayta daxil olub çıxanlar.
İsti auditoriya kiçikdir, amma orada müraciət qiyməti adətən bir neçə dəfə ucuz olur. Büdcənin 15-25%-ni retarqetinqə, yəni isti auditoriyaya ayırmaq praktikada yaxşı işləyir.
Nümunə bölgü: ayda 600 manat
Tez-tez istifadə etdiyimiz başlanğıc bölgü belədir. Əsas kampaniya, soyuq auditoriya: 330 manat (55%). Test, yeni kreativ və auditoriyalar: 150 manat (25%). Retarqetinq, isti auditoriya: 120 manat (20%).
İlk iki həftədən sonra rəqəmlərə baxılır. Testdə qalib gələn kreativ əsas kampaniyaya keçir, işləməyən dayandırılır. Bu qanun deyil, başlanğıc nöqtəsidir: sahəyə görə dəyişir.
Nə vaxt artırmaq, nə vaxt dayandırmaq
Büdcəni artırmaq üçün siqnal: bir müraciətin qiyməti ən azı bir həftə sabit qalıb və gələn müraciətlər satışa çevrilir. Artırarkən kəskin addım atmayın. Büdcəni birdən iki dəfə artırmaq alqoritmi yenidən öyrənmə mərhələsinə qaytara bilər, ona görə hər dəfə təxminən 20% artırmaq daha təhlükəsizdir.
Dayandırmaq üçün siqnal: bir müraciətin qiyməti hədəfinizdən iki dəfə bahadır və üç-dörd gündür düşmür. Bu halda problem büdcədə deyil, kreativdə və ya təklifdədir. Büdcə əlavə etmək onu həll etməyəcək.
